كوستاريكا … دولة ما كنت أعرف عنها إلا إنها احدى الدول اللي تشارك في كأس العالم لكرة القدم… و قد سمعت انها من الدول المصدرة للقهوة !
لكن الآن …
أصبحت من الدول اللي بيني و بينها قصة عشق …
حبيتها لـ :
- شعبها رائع، يحب الخدمة، ما حسيت بالعنصرية، و دائما مبسوطين … و على وقت زيارتي كان فيه مقال من الـ نيويورك تايمز يقول انهم اسعد سكان الأرض (المقال)
- الطبيعة اللي فيها … الصورة اللي على اليسار اخذتها انا في احدى المناطق اللي زرتها (بركان و جنبه هذي البحيرة) … و على طاري الطبيعة فيلم جيرسك بارك (Jurassic Park) صور هناك (المصدر)
- تطور هذي الدولة رغم قلة الامكانيات … قبل 20-30 سنة، كان 60٪ من دخلها قايم على البن و الموز و الأناناس. أما الآن بزيادة كمية البن و الموز و الأنانس فهو ما يشكل الا 11٪ … هذي النقطة لو اتكلم فيها و استرسل كان تكسرت يديني … لكن بصراحة شعب جالس يشتغل لبلده و تطويره … آآآآهـ بس يا بلادي و الله نقدر نصير أفضل مما حنا عليه الآن
- القهوة … القهوة الفرششششش … شي يدوخ، صدقوني اني كرهت ستاربكس، دانكن دونت، سياتلز بست … الخ (إلا سكند كب .. هذا في العلالي)
أشياء غريبه:
- طفله عمرها سنتين تشرب قهوة في الصباح، و المشكلة هي اللي تقول “كافيه، كافيه”
- غير ان ما عندهم عناوين (زينا في السعودية) لكن الغريب ان شوارعهم مالها اسامي … يوصفون بالبنايات و الجبال
- فطور، غداء و عشاء … و ان ماكنت غلطان الحلى كله فول … فيه طلب في ماكدونالدز اسمه (McPinto) .. ولكم تتخيلون الادمان الفولي
نصيحة لمحبين السفر
كوستاريكا دولة رائعة للسياحة، صغيره تلفها في ثلاثة أيام. تقدر تروح للمحيط الهادي و الأطلنطي في نفس اليوم بالسيارة. الأنشطه اللي فيها تفرح الكبير قبل الصغير
حسيت اني مكتب سياحي … لكن الآن أنا في نشوة السفرة مالي 3 أيام واصل من هناك
أخيرا،
ماهي Pura Vida؟
كلمة عرفتها قبل ما أمشي عن كوستاريكا … كلمة معناها “حياة صافية” و يستخدمونها في كل شي، في السلام، في الوداع، في البيع، في الشراء … تسمعها في كل سالفة
فـ بورا فيدا
ما شاء الله ….موضوع رائع .. وبالتوفيق بخرابيطك وشخابيطك